Smátt og stórt – Svandís Svavarsdóttir

Samstaða með börnunum

Álagið sem er á íslenskar fjölskyldur þessa mánuðina og misserin er mikið og fer vaxandi. Fleiri og fleiri missa vinnuna og þrengra verður í búi. Spennan eykst á heimilunum, áhyggjurnar vaxa, raunverulegar áhyggjur af morgundeginum, næstu mánaðamótum, vanskilunum, reikningunum og svo vantar mjólk.

Þar sem var spenna fyrir eykst hún. Heimilisofbeldi verður algengara og alvarlegra. Drykkja og ofneysla eykst. Fleiri börn fara hrædd og óörugg að sofa. Vakna með hnút í maganum.

Svo er ekki til fyrir íþróttaæfingunum, ekki til fyrir afmælisgjöfinni handa bekkjarsysturinni, og skóladagurinn byrjar. Og kennarinn er líka áhyggjufullur. Sparnaðurinn kemur niður á skólanum og frístundaheimilinu. Ekki í stóru – í smáu. Dagarnir eru breyttir.

Skilnuðum fjölgar, sambúðarslitum líka. Upplausn er einkenni kreppu.

Lausnirnar verða að taka mið af umhverfi barnanna. Við saman – allt samfélagið – berum ábyrgð á börnunum. Þau mega ekki líða. Ef samfélagið stendur með fjölskyldunum í að standa saman þá gengur allt betur. Við verðum að draga úr félagslegum áföllum eins og hægt er.

Það gerum við með atvinnuátaki og með því að standa vörð um börnin, þeirra daglega líf, þeirra rétt til að hlakka til, vona og vera glöð. Velferðarkerfið, menntunin og samstaðan er leiðin. Von sem byggir á kjarki og samstöðu er leiðin út úr íslensku kreppunni. 

     

Skellurinn bitnar á yngstu skólabörnunum

Nú hefur staðið yfir endurskoðun á fjárhagsáætlun Reykjvíkurborgar með það að markmiði að ná enn ferkari hagræðingu, enn meiri niðurskurði.

Í borgarráði í morgun voru lögð fram drög að þessari endurskoðun. Þar er eitt og annað lagt til  sem veldur áhyggjum. Við fulltrúar minnihlutans bókuðum þannig:

Bókun Vinstri grænna og Samfylkingar um endurskoðun fjárhagsáætlunar

Minnihlutinn tekur undir þakkir til starfsfólks og fagnar því að betri tími verði gefin til að fara yfir hugmyndir og gögn málsins.

Sérstök ástæða er til að fara yfir útfærslu niðurskurðar í skólastarfi þar sem fyrir liggur að það kennslumagn sem undir liggur jafngildir um 70 stöðugildum eða um það bil 14 kennsluvikum hjá börnum í 2.-4.bekk.  Jafnframt er gert ráð fyrir skerðingu á þjónustu frístundaheimilanna sem kemur beint niður á sömu börnum.

Þá er sérstök ástæða til að lýsa efasemdum um niðurskurð um 225 milljónir í viðhaldsframkvæmdum og 40 milljóna frestun viðhaldsframkvæmda í liðnum götum, gönguleiðum og opnum svæðum. Þetta er þvert á tillögugerð minnihlutans um átak í mannaflsfrekum viðhaldsverkefnum og getur varla talist skynsamleg forgangsröðun í núverandi atvinnuástandi.

 

Frumvörp og þingsályktanir úr ríkisstjórn 27. febrúar

Afköstin og krafturinn sem ríkisstjórnin sýnir er algerlega með ólíkindum. Hér er listi yfir þau frumvörp og þingsályktanir sem afgreidd voru úr ríkisstjórninni 27. febrúar en eru komin mislangt í þinginu. Sum eru þegar orðin að lögum en önnur eru í meðförum nefnda og eiga eftir að fá umræðu og afgreiðslu þingsins.

Það er þyngra en tárum taki að Sjálfstæðismenn skuli í stórum stíl drepa málum á dreif og vísvitandi tefja framgang og umfjöllun mála. Alvöruleysið í þeirra hópi er ótrúlegt í ljósi þjóðfélagsástandsins en um leið mikilvægt að þeir sýni kjósendum sitt rétta andlit.

Lýðræði, stjórnkerfi og réttlæti:

1) Frumvarp til laga um breytingar á lögum um kosningar til Alþingis (persónukjör)

2) Frumvarp til stjórnskipunarlaga (stjórnarskrárbreytingar og stjórnlagaþing)

3) Frumvarp til laga um breytingu á lögum um Seðlabanka Íslands

4) Frumvarp til laga um breyting á lögum um embætti sérstaks saksóknara

5) Frumvarp til laga um breytingu á ýmsum lögum er varða fjármálamarkaðinn (niðurfellingarreglur) (8 lög)

6) Frumvarp til laga um breyting á lögum um opinbert eftirlit með fjármálastarfsemi og á lögum um verðbréfaviðskipti (gagnsæi í störfum Fjármálaeftirlitsins) (2 lög)

7) Frumvarp til laga um breytingu á lögum um hlutafélög og lögum um einkahlutafélög (eignarhald, kynjahlutföll, starfandi stjórnarfor.) (2 lög)

8) Frumvarp til laga um afnám laga um eftirlaun forseta Ísland, ráðherra, alþingismanna og hæstaréttardómara (2 lög)

9) Frumvarp til laga um breyting á lögum um tekjuskatt og lögum um staðgreiðslu opinberra gjalda (skattaskjól)(2 lög)

Atvinnulíf og heimili:

10) Frumvarp til laga um breyting á lögum um aðför, lögum um nauðungarsölu og gjaldþrotaskiptalögum (3 lög)

11) Frumvarp til laga um gjaldþrotaskipti o.fl. (greiðsluaðlögun)

12) Frumvarp um breytingu á lögum nr. 54/2006, um atvinnuleysistryggingar, með síðari breytingum (hlutabætur ofl)

13) Frumvarp til laga um breyting á lögum nr. 129/1997, um skyldutryggingu lífeyrisréttinda og starfsemi lífeyrissjóða, með síðari breytingum (útgreiðsla séreignarsparnaðar)

14) Frumvarp til laga um breytingu á lögum um virðisaukaskatt (endurgreiðsla vegna viðhaldverkefna)

15) Frumvarp til laga um breyting á tollalögum, lögum um vörugjald og lögum um virðisaukaskatt (greiðsluaðlögun atvinnulífsins) (3 lög)

16) Frumvarp til laga um heimild til samninga um álver í Helguvík

17) Frumvarp til laga um breytingu á raforkulögum

18) Frumvarp til laga um breytingu á lögum um niðurgreiðslur húshitunarkostnaðar

Önnur ýmis mál:

19) Frumvarp til lögskráningarlaga

20) Eftirlit með skipum

21) Frumvarp til laga um breyting á lögum um íslenskan ríkisborgararétt

22) Frumvarp til laga um breytingu á lögum um náttúruvernd

23) Frumvarp til laga um breytingar á barnaverndarlögum

24) Frumvarp til laga um breytingu á lögum um málefni aldraðra vegna hækkunar gjalds í framkvæmdasjóð aldraðra

25) Frumvarp til laga um visthönnun vöru sem notar orku

26) Frumvarp til laga um iðnaðarmálagjald: breyttur viðauki

27) Tillaga til þingsályktunar um staðfestingu ákvörðunar sameiginlegu EES nefndarinnar nr. 71/2008, um breytingu á XIII. viðauka (Flutningastarfsemi)við EES-samninginn

28) Tillaga til þingsályktunar um staðfestingu ákvörðunar sameiginlegu EES nefndarinnar nr. 142/2008, um breytingu á VII. viðauka (Gagnkvæm viðurkenning á starfsmenntun og hæfi) við EES-samninginn

29) Tillaga til þingsályktunar um staðfestingu ákvörðunar sameiginlegu EES nefndarinnar nr. 114/2008, um breytingu á IX. viðauka (Fjármálaþjónusta) við EES-samningin

Mikilvægt réttlætismál

Þingmenn Vinstri grænna hafa verið að vinna gríðarlega mikilvægt og krefjandi starf undanfarna daga. Hluti af þessu mikla verki þingmannanna er mál sem Álfheiður Ingadóttir er fyrsti flutningsmaður að og snýst um að gera fólki kleift að höfða sameiginlega mál til kröfu um bætur í stað þess að hver einasti þurfi að höfða mál fyrir sig.

Málið er flutt af 10 þingmönnum úr öllum flokkum og væri mikil réttarbót auk þess að vera nýmæli í íslenskum rétti.

Álfheiður segir sjálf í frétt á visir.is: ,,Með því að innleiða slíkt úrræði væri réttarstaða fjölda manna bætt sem hafa svipaðar eða sams konar kröfur en þó svo lágar að þeim yrði vart fylgt eftir af einstaklingum m.a. vegna kostnaðar.”

Vinna fyrir alla

Nú eru 16.000 manns atvinnulausir á Íslandi. Þegar fólk er ekki í vinnu verður þjóðarbúið af beinum verðmætum auk þess sem það tapar skatttekjum. Út frá þessum forsendum er alveg skýrt að allra mikilvægasta verkefnið framundan er að skapa atvinnu fyrir allt þetta fólk á nýjan leik. Hvernig verður það best gert?

Svo vel vill til að fjármálaráðherrann og annar atvinnuvegaráðherrann er formaður Vinstri grænna. Atvinnumálin eru því í eins góðum höndum og mögulegt er. Forgangsverkefni hans og ríkisstjórnarinnar hljóta að vera að snúa hjólum efnahagslífsins af stað með því að gera bankana algerlega starfhæfa, en það eru þeir engan veginn. Starfhæfir bankar eru forsenda atvinnulífsins því þannig hafa fyrirtækin aðgengi að lánsfé, gjaldeyrisþjónustu og annari bankaþjónustu. Atvinna fyrir þúsundir einstaklinga byggir á því. Árangur á þessu sviði er því grundvöllur annarra aðgerða.

Um leið verðum við að þróa atvinnustefnu sem sýnir okkur svart á hvítu hvernig unnt er að skapa atvinnutækifæri fyrir alla sem eru atvinnulausir innan þriggja ára.  Það eitt út af fyrir sig að koma bönkunum af stað, ná niður verðbólgunni og að ná stöðugleika í raunhæfara gengi skilar stórfelldum verðmætum og þúsundum starfa. Þótt það sé sannarlega forsenda dugir það ekki til. Jafnframt á að setja það markmið sérstaklega að allir þeir sem eru atvinnulausir hafi vinnu fyrir lok ársins 2011, og að  yfirgnæfandi meirihluti þeirra sem nú eru atvinnulausir hafi vinnu fyrir lok næsta árs. Þetta er metnaðarfullt verkefni en þetta er mikilvægasta verkefni íslenskra stjórnmála um þessar mundir. Virkir bankar eru nauðsynlegir fyrir fyrirtækin en fyrirtækin fyrir fólkið.

Hvernig verður þetta gert? Með því að flétta saman styrk okkar í öllum greinum, hvort heldur er í landbúnaði, sjávarútvegi, iðnaði, umherfisvænni orku, ferðamennsku eða í grunnstoðum samfélagsins, velferð og menntun. Við allar ákvarðanir um atvinnusköpun þarf að horfa til búsetu og kyns. Við getum strax hafist handa og gert áætlanir með hverju einasta sveitarfélagi í landinu um forgangsröðun verkefna og sett mannfrek verkefni í forgang. Hvert einasta fyrirtæki í landinu getur gert slíkt hið sama. Það má gera með því að flétta saman félagslegt framtak og einkaframtak algerlega fordómalaust. Viðmiðið á ekki að vera gróði eða viðskiptavild heldur langtímahagur þjóðarinnar allrar. Skapa þarf sérstakan vettvang ríkis, sveitarfélaga og aðila vinnumarkaðarins til að leggja upp í slíka áætlun. Öll þessi vinna þarf auðvitað að byggjast á forsendum jafnréttis og sjálfbærrar stefnu í ákvarðanatöku. Ef við ýtum grænum sjónarmiðum og kvenfrelsissjónarmiðum til hliðar kemur  það okkur í koll síðar. Við megum aldrei aftur falla í þá gildru að tjalda til einnar nætur. Með öðrum orðum: Allar ákvarðanir verða að byggja á langtímasjónarmiðum. Við þurfum einmitt að venja okkur á að hugsa um ávinning eftir 10 ár en ekki eftir 10 daga, því ávinningur eftir 10 daga er oft hrun eftir 100 daga eins og reynslan sýnir okkur.

Atvinna fyrir alla skapar ekki aðeins tekjur; atvinna skapar líka sjálfsvirðingu, frelsi og samfélag.

Sóun samfélagsins er æpandi þegar framlagi 16 þúsund Íslendinga er hafnað. Þess háttar þjóðfélag gróða og græðgi viljum við ekki.

Hugleiðing um endurmat

Hugmyndafræðilegt endurmat Sjálfstæðisflokksins er langt undan. Nú stendur yfir tími sakbendinga bakvið luktar dyr, hjaðningavíga og innri baráttu. Nú munu þau “feika” sig í gegnum kosningabaráttu með peningum, slagorðum og hönnun. Byggja á hefðum, venjum og ótta Íslendinga, – kjósenda sinna. Nú munu þau rifja upp gamla sigra, gamlar sögur, gamla áfanga og flesta frá því áður en 18 ára tímabilið hófst, áður en Jón Baldvin reri með Davíð út í Viðey og færði honum völdin.

Forval í Reykjavík og Kraga hjá VG

Verulega gaman að sjá hversu margir gefa kost á sér í forvölum VG sem framundan eru. Það er mikilvægt að fólk geti tekið þátt og valið sína frambjóðendur. Valið það fólk sem það vill sjá halda stefnu VG á lofti fyrir þessar gríðarlega mikilvægu kosningar sem framundan eru. Vinstri græn hafa þann háttinn á að kynningin fer fram á vegum félagsins til að tryggja að frambjóðendum verði ekki mismunað eftir efnahag. Þátttakan er mikil, áhuginn er mikill enda á stefna og sýn vinstri grænna mikinn hljómgrunn í samfélaginu og frammi fyrir þeim verkefnum sem framundan eru.

Öllum markmiðum búsáhaldabyltingarinnar náð!

Með því að ný lög um Seðlabanka Íslands hafa verið samþykkt er öllum markmiðum búsáhaldabytingarinnar náð! Til hamingju Ísland!

Þáttaskil á hverjum degi

Staðan í íslenskum stjórnmálum er á miklu floti. Einstaklingar og flokkar meta og endurmeta stöðu sína nánast á hverjum degi. Karlar og konur sem hafa verið hluti af okkar daglega og pólitíska lífi dag hvern um árabil eru að segja skilið við stjórnmál. Maður kemur í manns stað. En vonandi er tími Davíðs liðinn og þeirra aðferða, gilda og vinnubragða sem hann stóð fyrir. Við þurfum ekki sterka leiðtoga núna. Við þurfum gagnsæi, fjölbreytni, þátttöku og raunverulegt lýðræði.